सोळा आण्याच्या गोष्टी - मात! - अज्ञातवासी

वरच्या खोलीत बाळ शांत झोपलं होतं...
खिडकीतून जाडजूड जनावर सरपटत आलं, आणि खोलीत शिरलं...
वाड्यात लगबग सुरू होती.
जनावर माणसांची चाहूल घेत हळूहळू फुसफुसत बाळाच्या दिशेने जात होतं...
★★★★★
खळ्ळ्ळ!!!!
"अगबाई, काय पडलं," म्हणत राधाबाई वरच्या खोलीत धावल्या.
पाचफुटी जाडजूड फोटोफ्रेम पडली होती...
तिच्याखाली जनावराच्या डोक्याचा चेचरा झाला होता...
राधाबाई ते दृश्य बघून जागीच थंडगार पडल्या!
भानावर आल्यावर त्यांनी किंचाळी फोडली आणि बाळाला घेतलं.
"बिनाआईचं लेकरू, कुणाची नजर लागली, भगवंता, इडापीडा टळू दे, हडळ, चेटकीण, चांडाळीण, डाकिन, हबशीन कुणाची नजर लागली असलं, तर सगळ्यांचा नायनाट कर..."
राधाबाई पुटपुटत होत्या...
★★★★★
काचांच्या थारोळ्यात फोटो पडलेला होता.
फोटोमध्ये बाळाची आई हसत होती...