कलाटणी (एक सत्य)

कलाटणी (एक सत्य)
आयुष्यात प्रत्येकाला
सर्वच काही मिळत नसतं,
"नशिबात नव्हतं"
म्हणताना
मिळालेलं दृष्टिआड होत असतं.

आयुष्यात प्रत्येक वळणावर
आपण काही घेत असतो,
"नशिब आजमावलं"
म्हणताना
निसटलेलं दुर्लक्षित होत असतं.

आयुष्यात प्रत्येक सुखाला
दु:खाचाही एक पदर असतो,
"सुखावलं"
म्हणतानाही
डोळ्यातून एखादा
अश्रूच
ओघळत असतो,

आयुष्यात प्रत्येक गोष्टीची
ठराविक अशी
एक वेळ असते,
"संपलं सारं"
म्हणतानाच अगदी
बरेचदा
नशिब कलाटणी देऊन बसते.
.....प्रांजली.