कसे सांगू

आषाढी या मेघाजवळी
निरोप धाडतो तुला ।
वार्‍याच्या वेगाने सत्वर
सखे भेट तू मला ॥

ते कोसळणे नसे नभांचे
माझा अश्रूपात असे ।
ते बिजलीचे नाही क्रंदन
माझे आक्रंदन असे ॥

शापित यक्ष सखे तुझा हा
तुझिविना तगमगतो आहे ।
दूर इथे या विरहगिरीवर
तुझ्याचसाठी झुरतो आहे ॥

ना काळाचे अन् वेळेचे
नुरले सखये मजला भान ।
ध्यासाने ते तुझिया माझे
झाले मजनूचे ग ध्यान ॥

तुझा दुरावा कसातरी हा
आजवरी साहिला ।
ये ये आता लवकर तू ग
अंत निकट आला ॥

कसे तुला ग मी सांगू ते
झाली माझी काय गती ।
प्राण तिथे अन् शरीर येथे
अशी झाली माझी स्थिती ॥