मायबोलीवूडचा नवा सुपर्रस्टार - फा फे अमेय वाघ ट्टॉक् !

मला अमेय वाघ तसा फारसा आवडत नव्हता. आजवर जे काही त्याला छोट्या मोठ्या पडद्यावर थोडेथोडके पाहिले त्यात त्याचे कैवल्य हे एकच कॅरेक्टर आवडले होते. पण त्यावरून मला अमेय वाघ आवडतो हा दावा मी कधीच केला नव्हता. पण आज तो पुन्हा एका नवीन रुपात आवडला. त्याच्या आधीच्या आवडलेल्या भुमिकेपेक्षा अगदीच वेगळ्या भुमिकेत. आणि अफाट आवडला.

मुळात हा चित्रपट माझ्यासाठी एक आश्चर्याचा धक्का होता. मराठीमध्ये या जॉनरचा चित्रपट एवढा सही बनू शकतो हेच पहिल्यांदा खूप भारी वाटले.
यात दिलीप प्रभावळकरांसारखा दिग्गज अभिनेता आहे. छोट्या छोट्या तुकड्यांतून पुर्ण चित्रपट खाऊन टाकणारा गिरीश कुलकर्णी आहे. पण तरीही चित्रपट अमेयमय झाला आहे. तो पुर्ण चित्रपटभर पसरला आहे. ईतका की तो पडद्यावर न दिसणारा सीन आठवणे अवघड जावे, अर्थातच त्याचाच तर आहे फाफे, पण तरीही कुठेच त्याचा ओवरडोस झाल्याचे वाटत नाही. ड्रायफ्रूटस आपल्या कितीही आवडीचे असले तरी आईसक्रीम खाताना जर दर दुसरया घासाला तोंडात येऊ लागले तर कचकचू लागतात, पण अमेय मात्र आईसक्रीमच्या फ्लेवरसारखा यात मिसळलाय.

येस्स, या फाफेच्या जमलेल्या आईसक्रीममध्ये पटकथा हे दूध असेल, वेगवान मांडणी हे साखर असेल, गिरीश कुलकर्णी हे ड्रायफ्रूटस असतील, तर या आईसक्रीमला फ्लेवर देणारा अमेय वाघ आहे. आईसक्रीम जसे त्याच्या फ्लेवरवरून ओळखले जाते तसे यापुढे जगाच्या अंतापर्यंत फास्टर फेणे हा अमेय वाघ म्हणून ओळखला जाईल.
आणि अमेय वाघ हा देखील फास्टर फेणे म्हणूनच ओळखला जावा यासाठी मी रितेश देशमुखला मनापासून विनंती करतो की भावा, येऊ दे या चित्रपटाचे दोन चार सिक्वेल.

आशयघन चित्रपटांसाठी ओळखल्या जाणारया या मराठी चित्रपटसृष्टीने दुनियादारीच्या निमित्ताने व्यावसायिक यश चाखले. सैराटने त्याला वेगळ्या ऊंचीवर नेत सोबत आपला क्लासही जोडला. पण एक नटसम्राटचा अपवाद वगळता सैराटनंतर पुढे काय हा प्रश्न सर्वांसारखाच मलाही पडलेला. कारण मराठी चित्रपट सृष्टीला तगवायला दर्जेदार बॉक्स ऑफिस हिट चित्रपटांची अधूनमधून गरज होतीच. त्यात मध्यंतरी रितेशच्या लय भारी सारख्या लयंच बंडल चित्रपटाला मिळालेले व्यावसायिक यश मला घाबरवून गेलेले की आता अश्या टिपिकल टुक्कार सौथेंडियन आणि सलमानछाप चित्रपटांची लाट मराठीतही येते की काय.. पण या भितीला आणि वरच्या प्रश्नाला उत्तर द्यायलाच जणू आलाय अमेय वाघ आणि त्याचा फास्टर फेणे !

एक किरकोळ शरीरयष्टीचा, पोरसवदा नायक. जो तुमच्या आमच्यातीलच वाटतो. फक्त जरासा चपळ, थोडासा स्मार्ट. सोबत आहे प्रामाणिकपणातून येणारा बावळटपणा, जो येणारया संकटांचा सामना करायची हिंमत देतो.. अशी व्यक्तीरेखा पडद्यावर जिवंत करणारया आणि तिने दिलेल्या लढ्याला तितकेच विश्वसनीय बनवणारया फास्टर अमेय फेणेला नक्की बघा आणि थिएटरातच बघा... जर चुकवलात, तर चुकाल! आणि एका मस्त चित्रपटाला मुकाल .. ट्टॉक् !