खरी श्रीमंती.

खरी श्रीमंती.

ती- आई हि बघ.... नोट मिळालीय आज.
आई- दाखव... काय ग? चोरी केलीस? एवढी मोठी नोट ग कशी दिली कोणी?
ती- चोरी का ग करू? तू तरी नको ना बोलू असं ... त्या गाडीवाल्यानं दिली ना .. सिग्नल लागलान तेव्हापासून मागत होते त्याच्याकडं.. काचेवर मारलं म्हणून रागाने बघितलं... पण दिली जाताना हि नोट.. मग आले धावत तुझ्याकडं.
आई- खरं का...?
ती- अगं खरंच.
आई- बरं, बरं... जा तू.. आज रात्री थोडं बरं खाऊ. काय त्ये... तुझं त्ये चायनीज खाऊ.. आज नाही झोपवायची तुला नुसता पाव वडा खायला घालून ... जा पळ आता .

(झाली रात्र एकदाची.)

गेली एका चायनीज विकणाऱ्या गाडीवर... त्यांचा अवतार बघून झाली काही लोकं बाजूला.
चायनीज वाला- ए ... हो बाजूला...
आई- बाजूला कशाला ? पैसे हायेत ...
चायनीज वाला- पैसे नको ... रुपये दे...
आई- हो .. हो... हे बघ... मोठी नोट हाय... दे आता चायनीज.
चायनीज वाला- मोठी? बघू... अरे हि तर छोटी झाली आज ... म्हणून तर अली तुझ्याकडं... नाय चालत आता हि... बंद झालीय... ब्यांकेत जा, अकाउंट हाय ना? ( असं म्हणून जोरात हसायला लागला तो...)

तिला काहीच कळंना... पैसे हायेत पण चालत न्हाईत.? आजूबाजूची सगळी हसतायेत ... येड लागायची वेळ आलीय.. पोरगी इथे मागे लागलीय.... प्रश्न प्रश्न प्रश्न....................

तितक्यात...

तो- काय झालं ग ?
आई- पैसे हायेत पण चालत न्हाईत... ब्यांक पण नाही... पोरीला खाऊ घालणार व्हते.. चायनीज....
तो- आण ते...
आई- काय पैसे?
तो- हो... दे .. दे... परत देतो... ह्या बदल्यात हे घे.. माझं आहे ब्यांक अकाउंट ... मी घेईन बदलून. (जीवाचा आटापिटा करून त्याने दिवसभरात 500 चे सुट्टे मिळवले होते... पण आता या क्षणाला त्याच्यापेक्षा तिच्या ते जास्त गरजेचे होते... दिले त्याने ते तिला.)
आई- (अजूनही प्रश्न डोक्यात ठेऊन... पण निमूटपणे घेतले ते पैसे... पोरीच्या दीनवाण्या चेहऱ्यासमोर काही विचारावं असं सुचलंच नाही तिला ) उपकार तुझे दादा... सुखी राहा...

तो गेला तिथून... त्या दोघींच्या चेहऱ्यावरचा आनंद पाहून सुखावला तो ... शांत झोपही लागली.

गाडीवाल्याने खरंच "भीक" दिली होती आणि त्याने "माया" दाखवली होती. पुण्याईचा तराजू त्याच्या दिशेने झुकला होता. तितकंच त्या सुशिक्षित जीवाला पुरेसं होतं….. खरी श्रीमंती सत्कार्यात असते ती त्याने मिळवली होती.

………............ मयुरी चवाथे- शिंदे.

( 500 आणि 1000 च्या नोटा चलनातून बंद... जोक्स खूप पाठवले पुढे... पण खरंच जमलं, तर... आता मदतीसाठी हात पुढे करा. कोणी असा लाचार, अशिक्षित दिसला तर त्याला मदत करा. खरे श्रीमंत बना. )