बांधू पुन्हा नव्याने घरटे.. .

Submitted by बाळ पाटील on 22 October, 2016 - 05:13

बांधू पुन्हा नव्याने घरटे खुशाल आता
स्वप्नात काय येती मोठे महाल आता

पणती विझून गेली भेदीत यातनांना
दारात काळजाची ठेवू मशाल आता

हासून घे जरासे दडवून रोष सारा
या मृगजळी सूखाचा लावू निकाल आता

रीतीरिवाज पाळू ,आलो तसेच जावू
आयुष्य वेदनेला करुनीे बहाल आता

ही सामसूम आहे नांदी इथे कशाची
निमिषात वादळेही करतील चाल आता

कळली तुला मलाही नाही अखेर क्रांती
सांडून रक्त थोडे उधळू गुलाल आता
_बाळ पाटील

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा