आठवणीच्या सुरावटींवर...

आठवणीच्या सुरावटींवर,लाख तराणे झाले...
स्विकारू धगधगते वास्तव,फार बहाणे झाले!

हजार वाटा आल्या-गेल्या,पाय कुठे ना वळले...
एका वाटेवरती माझे,येणे-जाणे झाले!

कितीक वाटा चालत आलो..कुठे जायचे आहे?
आज तरी ने तिथे जिथे ना कधीच जाणे झाले!

कला जिण्याची शिकण्यासाठी,काय लागते सांगा?
'दुःख' एवढे लिहिले मी अन् लाख दिवाणे झाले!

गझल वाचता..एक उसासा सारे सांगुन गेला...
टाळ-टाळले नाव तुझे पण,शेर उखाणे झाले!

काय व्हायचे आयुष्याचे?प्रश्न तसा हा नव्हता...
हाक तुझी कानावर आली..सुरेल गाणे झाले!

—सत्यजित