Submitted by सत्यजित... on 5 January, 2016 - 09:51
हासण्याचा देत मी आधार आहे...
दुःख माझे आजही लाचार आहे!
चांदण्या होतात दुःखे रोज रात्री...
अन् मला म्हणतात की अंधार आहे!
वारलो नव्हतो तसा पण बोंब झाली...
ते म्हणाले आज तर रविवार आहे!
मी सुऱ्यावर भाळलो अन् वारलोही...
तो म्हणाला मी नव्हे कट्ट्यार आहे!
काल ज्याने बेत केला मारण्याचा...
आज खांदा देत माझा यार आहे!
प्रश्न ते करतात की करतो किती मी...
प्रेम हे नातेच की व्यवहार आहे!
दुःख आहे फार याचे दुःख नाही...
दुःख माझे हासणे व्यभिचार आहे!
जीवना जे द्यायचे भरपूर दे तू...
तार अथवा मार मी तय्यार आहे!
—सत्यजित
विषय:
Groups audience:
Group content visibility:
Public - accessible to all site users
शेअर करा
