हातोडी

(केशवसुतांची क्षमा मागून हे विडंबन लिहीले आहे.)

एक हातोडी द्या मज आणूनि.
प्रहार करीन प्राणपणाने.
घण घण वाजे घुमेल गाने.
मस्त तिच्या त्या फटकार्‍याने.
अशी हातोडी द्या मजलागुनि.

भ्रष्ट यंत्रणा छेदून जाईन.
पूर्व पश्चिम उत्तर दक्षिण.
नाठाळाना शोधुन काढीन.
घाव त्यंच्या मस्तकी घालीन.
कोण हातोडी मजला देईल?

खुजे पुढारी सत्तेवर बसले.
राज्य शकट हाकतील कसले.
असे दृष्य जर का दिसले.
फोडून टाकीन सिंहासन तसले.
अशी हातोडी द्या तर मजला.

हातोडीस त्या दणकट दांडा.
छिन्न विछीन्न करील गुंडा.
धजेल का मग कोणी बंडा.
तिच्या किर्तीचा फडकेल झेंडा.
अशी हतोडी हवी एकतरी.

नव्या मनुच्या हाती हातोडा.
मंदिर मस्जिद अवघे पाडा.
त्या जागेवर धर्मही गाडा.
मानवतेचा पळवा गाडा.
नको तुतारी हवा हातोडा.