कालच्या खाणाखुणांचा

शोध घेतो कालच्या खाणाखुणांचा
ओंजळी भरता न आलेल्या सुखांचा

वर्तमानी दाह आहे वास्तवांचा
वाटतो आधार हल्ली आठवांचा

बंद होतो श्वास लाखो स्त्रीभ्रुणांचा
द्यावया नरडीस, तोटा ना नखांचा

पंचतारांकित उभ्या देवालयांनी
भरभराटी काळ केला देवतांचा

वाद मी घालून बुरखे फाडल्याने
जाहलो शत्रू छुप्या संभावितांचा

वेधशाळेचा जसा अंदाज असतो
वाचतो पाढा उद्याच्या भाकितांचा

जे हवे देतोस देवा लाडक्यांना
पण मला आहेर का रे! वंचनांचा

वाव नाही नवविचारांना जराही
दबदबा इतका इथे प्रस्थापितांचा!

हिरवळीचा प्रांत ओलांडून जाता
ऐकला आक्रोश तिथल्या शोषितांचा

प्रश्न सोडवतोच आहे, सांज झाली
शोध नाही संपलेला उत्तरांचा

का असे "निशिकांत" तू मिटतोस डोळे?
बघ कसा जल्लोष चालू आक्रितांचा!

निशिकांत देशपांडे. मो.क्र. ९८९०७ ९९०२३.
E Mail--- nishides1944@yahoo.com