वादसंवाद २ - सत्पात्री दान

अरे देवाऽऽ

बोल वत्सा ..

मस्करी नको रे..

काय झाले?

मी एग फ्रॅंकी ऑर्डर केली..

मग ठिक आहे ना..

काय ठिक आहे ना? आज संकष्टी आहे.

मग असू दे ना, तू दुखी कष्टी कशाला होतेस?

अरे एग फ्रॅंकी !! नॉनवेज..!! आज कशी खाऊ.. त्याने बनवायलाही घेतली, आता ऑर्डर बदलणार नाही तो.

दुसरी मागव., ही पार्सल करून घरी ने..

दुसरी तर मागवेनच रे, पण ही घरी नेता येणार नाही.. नाहीतर घरी वेगळ्या शिव्या पडतील.
ही ईथेच कुणालातरी द्यायला हवी.

सॉरी, पण मला जराही भूक नाहीये मी सांगितलेय तुला.

ह्म्म आय नो.. जाताना स्टेशनबाहेर भिकारी भेटेल कोणीतरी, तेवढेच पुण्य पदरी..

पण त्याची सुद्धा संकष्टी असली तर..

त्याची कसली संकष्टी?

जसली.. आय मीन, जशी तुझी आहे.

हो., पण ते कश्याला संकष्टी पाळतील. त्यांना खायला मिळते आहे हेच खूप आहे त्यांच्यासाठी..

ओके, म्हणजे संकष्टी पाळणे हे पोट भरलेल्यांचे छंद आहेत तर..

बाबा, तू आता उगाच सुरू नको होऊस.. असेल त्याची संकष्टी तर नाही खाणार तो.

हो, पण तू देताना विचारून दे. त्याची संकष्टी बुडाली तर पुण्य कमावायच्या नादात पाप लावून घेशील डोक्याला.

कोणाला विचारू? भिकार्‍याला?

हो मग काय झाले, आपण अंड्याचा केक वाटताना नाही का, आधी समोरच्याला चालते का विचारून मगच देतो.
आणि राहिला प्रश्न भिकारी असण्याचा, तर ते आपण सारेच आहोत. संकष्टीला नॉनवेज न खाणे हे देखील देवाला खुश करत त्याच्याकडे काहीतरी मागण्यासाठीच ना..

देवाकडे मागण्याला भीक मागणे नाही म्हणत.

एखाद्याकडे काहीतरी मागणे, बदल्यात त्याला काहीही न देता, हे भीक मागणेच झाले.
आणि पेटीतील दक्षिणेबद्दल बोलत असशील तर ती देवापर्यंत जात नाही हे तुलाही माहीत आहेच.

मी देवाकडे फक्त सुख मागते.

जे आपल्याकडे आहे त्यातच सुख मानले तर ते देखील देवाकडे मागावे लागत नाही.

मी हरले असे बोलल्यावरच तू थांबणार आहेस का?

हा हा, नाही..
चल दान कर ती एग फ्रॅंकी. ते सुद्धा संकष्टीबद्दल न विचारता. कारण त्या सो कॉलड भिकार्‍यांचे सुख पोट भरण्यातच आहे.
कोणाच्या तरी सुखाचे कारण बन. कोणासाठी तरी आज देव बन. म्हणजे पाप लागण्याचा प्रश्नच येणार नाही.. तथास्तु

- ऋन्मेऽऽष

...........

वादसंवाद १ - अ‍ॅम्बिशन अमेरीका