माझ्यातुनी स्वतःला तो सोडवून गेला

Submitted by सुप्रिया जाधव. on 20 March, 2015 - 13:18

लोटून दार आला, ओढून दार गेला
आला तसाच वारा अंगावरून गेला

कळणार दु:ख नाही त्या लांबच्या दिव्यांना
रात्री जरी कवडसा सलगी करून गेला

काही कळ्या-फुलांची आरास मांडलेली
उन्मत्त काळ आला अन विस्कटून गेला

चोहीकडुन दिव्यावर धरली असून ओंजळ
सरले क्षणात इंधन, गेला विझून गेला

चल थांबवू अता हे झंकार पैंजणांचे
अर्ध्यात मैफिलीला तो ठोकरून गेला

शोधीत जन्म गेला ज्याच्यामधे स्वतःला
माझ्यातुनी स्वतःला तो सोडवून गेला

( मतला न सुचलेली गझल)

-सुप्रिया.

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

लोटून दार आला, ओढून दार गेला
आला तसाच वारा अंगावरून गेला........ क्या बात है

रात्री जरी कवडसा सलगी करून गेला........ मस्त

शोधीत जन्म गेला ज्याच्यामधे स्वतःला
माझ्यातुनी स्वतःला तो सोडवून गेला..... हा तूफानी शेर ..
आवडली

Submitted by किरण कुमार on 21 March, 2015 - 05:52