धूळ झटकुनी आठवणींची सदैव पाने चाळत असतो
वर्तमान ना भविष्य ज्याला,भूतकाळ तो वाचत असतो
नवे धुमारे, नवीन पाने फुटावयाचे मोसम गेले
भान ठेउनी ऋतुचक्राचे, आनंदाने वाळत असतो
रुढी प्रथांच्या ठिणग्यांचा का त्रास असावा नव्या पिढीला?
स्वतः ठरवुनी जगावयाचा हक्क मुलांचा मानत असतो
भांडीकुंडी, धुणी बायको करते, पण दारिद्र्य झाकण्या
घरात लक्ष्मी पाणी भरते असे जगाला सांगत असतो
नास्तिकवादी एकच मुद्दा धरून म्हणती "देव दाखवा"
दृष्टीला ना पडे तरीही फुलात दरवळ नांदत असतो
दु:खाचा लवलेश नसावा असे जरी का वाटत असते
हीच अपेक्षा पूर्ण न होता, दाह जिवाचा वाढत असतो
भरून आल्या मेघांचा अन् मोरांचा संबंध नसावा
आनंदी बळिराजा पाहुन मोर कदाचित नाचत असतो.
गर्भामध्ये माय पेलते ओझे ज्यांचे त्याच मुलांना
वयोपरत्वे ओझे होता, काटा ह्रदयी बोचत असतो
विसराळू "निशिकांत" एवढा! विसरुन गेला तुला विसरणे
आठ्वणींचा दोर आजही गळ्याभोवती काचत असतो
निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com
भरून आल्या मेघांचा अन्
भरून आल्या मेघांचा अन् मोरांचा संबंध नसावा
आनंदी बळिराजा पाहुन मोर कदाचित नाचत असतो.<<< व्वा
धूळ झटकुनी आठवणींची सदैव पाने चाळत असतो
वर्तमान ना भविष्य ज्याला,भूतकाळ तो वाचत असतो<<< मतला आवडला.
नवे धुमारे, नवीन पाने फुटावयाचे मोसम गेले
भान ठेउनी ऋतुचक्राचे, आनंदाने वाळत असतो<<< शेर आवडला.
छान...आवडली
छान...आवडली
बेफिजी, मनापासून अभार आपले.
बेफिजी, मनापासून अभार आपले. आपणास एका गझलेती तीन शेर आवडणे, माझ्या करिता फार मोठी बाब आहे
आरविंदजी आभार आपले प्रतिसादासाठी.
अनेक ओळी अनेक शेर खूप आवडले
अनेक ओळी अनेक शेर खूप आवडले काका
काका, एकदम मस्त.. जाम आवडली
काका,
एकदम मस्त..
जाम आवडली गझल
धूळ झटकुनी आठवणींची सदैव पाने
धूळ झटकुनी आठवणींची सदैव पाने चाळत असतो
वर्तमान ना भविष्य ज्याला,भूतकाळ तो वाचत असतो...
>> एकदम जबर..