झाडाचं नाक

Submitted by सई केसकर on 13 June, 2014 - 07:31

आई, झाडाचं नाक कुठे असतं गं?
आता हे काय नवीन!
सांग ना! कुठे असतं झाडाचं नाक?
अगं झाडाला एके ठिकाणी एक नाक असं नसतं, झाडाला खूप छोटी छोटी नाकं असतात, पानांत, मुळात, सगळीकडे!
अय्या हो? आमच्या योगा टिचर सांगत होत्या की आपण जो श्वास सोडतो ना, तोच श्वास झाडं घेतात आणि आपल्याला स्वच्छ श्वास परत देतात!
हो तसंच काहीसं. पण ठकू, तुला अजून एक गम्मत माहितीये? हा स्वच्छ श्वास झाडं स्वयपाक करून तयार करतात!
काहीतरीच आई! झाडांकडे कुठे किचन असतं! आणि झाडांना हात तरी कुठे असतात?
तीच तर गम्मत आहे ठकूताई! झाडांना स्वयपाक करायला फक्त तीन गोष्टी लागतात. आपल्यासारखं भाजी आणा, तेल आणा, साखर संपली असे प्रश्न झाडांना कधीच पडत नाहीत.
मग? कसा करतात झाडं स्वयपाक?
ऊन, पाणी आणि कार्बन डाय ऑक्साइड वापरून! म्हणजे आपण जो श्वास सोडून देतो ना, त्यात कार्बन डाय ऑक्साइड असतो. आपण गाडीतून फिरायला जातो ना, तेव्हा आपली गाडीसुद्धा कार्बन डाय ऑक्साइड तयार करते.
कार्बन डाय ऑक्साइड कसा दिसतो? आणि ऊन कसं वापरणार? ऊन तर नुसतं पडतं!
कार्बन डाय ऑक्साइड दिसत नाही गं राणी, हवा तरी दिसते का? आणि ऊन म्हणजे सुद्धा सूर्याकडून आपल्याला मिळालेल्या उष्णतेच्या छोट्या छोट्या पुड्या असतात. आपण कसा गॅस वापरतो, तशी झाडं ऊन वापरतात. पाणी तर तू रोजच घालतेस झाडांना!
मग? झाडं काय बनवतात? वरण भात?
हा हा! नाही! झाडं साखर बनवतात.
नुसती साखर खातात झाडं?! त्यांचे दात किडत नाहीत?
झाडांना दातच नसतात, आणि झाडांची साखर तू खातेस त्या साखरेपेक्षा वेगळी असते.
मग आई, मी पाणी प्यायले आणि उन्हात उभी राहिले तर मी पण माझा माझा स्वयपाक करू शकीन?
तू हिरवी आहेस का?
नाही! मी तर बेसनचा लाडू आहे!
मग नाही करू शकणार तू स्वयपाक. तुला माझ्यासारखाच स्वयपाक करावा लागेल. झाडांचा हिरवा रंग त्यांना स्वयपाक करायला मदत करतो. आणि त्यांच्या खाऊ बनवायच्या प्रक्रियेतून आपल्याला प्राणवायू मिळतो. म्हणजेच तुझ्या टीचरनी सांगितलं तसं आपल्याला स्वच्छ श्वास मिळतो.
अच्छा! म्हणजे झाडं कधी दुकानात किंवा मंडईत जातच नाहीत. किती छान!
हो! आणि आपण झाडं खातो! किंवा लुसलुशीत गवत खाणाऱ्या गायीचं दूध पितो, किंवा झाडांवर आलेले मके खाऊन फुगलेली कोंबडी खातो!
खरंच की! म्हणजे आपण श्वास आणि जेवण दोन्ही झाडांमुळे घेतो! खूप मदत करतात आपल्याला झाडं!
बरोब्बर. म्हणूनच ठकुताईनी दर वर्षी एक झाड लावलं पाहिजे!

मूळ पोस्टः http://thhakoo.blogspot.in/2014/06/blog-post.html

Group content visibility: 
Public - accessible to all site users

मस्त ! Happy

छानच Happy

Happy

छानच

आवडले Happy

Happy

क्युट

Happy

सही!!

@ रिया

हो! चालेल ना!

@शूम्पी
ठकू सिरीजचं टारगेट ऑडियन्स कोणता एज गृप आहे सई?
असं काही नाही. ज्याला आवडेल तो ग्रूप!

सई, ... कस्लं भारी जमलय हे. भयंकर आवडलं.
ह्याची लिन्क देणारय धाकुल्या मैत्रिणींना ... ज्यांच्या घरी अशा ठकूताई, ठकसेन आहेत.

मस्त.