पाहिले कुणी ना माझे काळिज हे भळभळताना.....

पाहिले कुणी ना माझे काळिज हे भळभळताना.....
दाखवू कशाला माझे मी काटे दरवळताना?

होतोच कुणीही भावुक घेताना निरोप वेड्या....
होतेच दु:ख हृदयाला वाटेवरती वळताना!

वाचतात कोणी गझला तर करतो कुणी टवाळी....
कोणीच पाहिले नाही पण, मजला तळमळताना!

माणसे अशी वावरती की, साप, नाग हिंडावे.....
चाहूल येत नाही पण, ती भवती सळसळताना!

मी हसलो, माझ्यावरुनी मस्करी जाहली म्हणुनी....
मी फक्त पाहिले मजला अंतरात कळवळताना!

मी कुठे मारतो हाका सखये तुज घडीघडीला?
दे हात जरासा मज तू, मी मधेच अडखळताना!

झोपलोच नव्हतो केव्हा जन्मात गाढ मी इतका.....
मी निवांत निजलो होतो सरणावरती जळताना!

-------प्रा.सतीश देवपूरकर
फोन नंबर: ९८२२७८४९६१