विकास गड्यांनो विकास

हवी थोडी गर्दी मलाही
थोडी थोडी कुजबुजणारी
माझा गौरव करणारी
वल्गनांना दाद देणारी
नेता म्हणून मला मिरवणारी

रोज रोज करूनी श्राद्ध
माझ्याच परिस्थितीचे
मी काढतो वाभाडे
नवा भटजी रोज आणतो
रोज पिंड काकमुखी घालतो

त्यांचेही सरकार असते म्हणे
तेही टोप्या घालतात म्हणे
मोठमोठी झाडे धरतात
फांदीसाठी धडपडत बसतात

कुणीच मेले नाही तर स्वतःचेच
पोस्ट मॉर्टेम करतात
बाहेर आलेली आतडी
गळ्यात घालून म्हणतात
चला, भकासाचा विकास करू या.