चालतो मी बोलतो जे

मापताना वेस माझी..काळजी तू घे जरा
जो दिसे तो मी नसे पण, मी तसा आहे खरा

का दिलासा देत नाही, आरसा आता मला
राहिलो ना आज येथे..मीच माझा आसरा

परतले कित्येक वेळा, शब्द ओठी येउनी
ती जरा हळवी तशी अन्, मी जरासा लाजरा

मी इथे नाही कुणाचा, ना इथे माझे कुणी
बघ हवेला होत आहे...आज वारा बोचरा..

पांघरूनी वेड आहे, हा जमाना बेरका
चालतो मी बोलतो जे, मी कुठे आहे बरा?

=====================================
मी तशी गोंजारली पण शांत ना झाली दुखे
बोट माझे कापलेहा..लाघवी आहे सुरा

मी तसा निश्चिंत आहे...वाहतो वार्यासवे
सांगना मज कोण तो जो , वाहतो माझी धुरा

फार चिवडा होत आहे, फोडणी मोठी इथे
हळद आहे मोजकी पण, होत पिवळा कुरमुरा