तुला सांगायचे आहे........

उरीचे श्वास दरवळले, तुला सांगायचे आहे
तुला नाहीच जे कळले, तुला सांगायचे आहे

तुझ्या डोळयांमध्ये जेव्हा उगा डोकावले वेडे
कसे आभाळ सावळले, तुला सांगायचे आहे

इथे लाटेतुनी जेव्हा, तुझी चाहूल आलेली
मनाचे तीर नीतळले, तुला सांगायचे आहे

मुके मन ओंजळीमध्ये किती झाकून ठेवावे
कधी हातून ओघळले, तुला सांगायचे आहे

तुझा होकार येताना, जिथे नजरेतुनी झुकल्या
नभीचे चंद्र साकळले, तुला सांगायचे आहे

किती हे आवरावे तू, स्वत:ला दूर जाताना
तरी पाऊल अडखळले , तुला सांगायचे आहे

आनंद पेंढारकर