अबोली

Submitted by रसप on 22 May, 2013 - 03:23

अबोलीच्या फुलांचे
तुझ्या-माझ्या मनांचे
घरांच्या अंगणांचे
कुणी ऐकायचे ?

छतांच्या झुंबरांशी
कड्यांच्या बंधनांशी
जवळच्या अंतरांशी
किती भांडायचे ?

स्मृतींच्या पाउलांना
पसरत्या सावल्यांना
तरल कातर छटांना
कसे वाचायचे ?

तुझे येणे न होते
तुझे जाणे न होते
तुझे असणे न होते
कधी सांगायचे?

इथे सारा पसारा
अनावर कोंडमारा
छुप्या पाऊसधारा
कसे टाळायचे ?

तरीही हाक द्यावी
उरी आशा रुजावी
नजर ओली थिजावी
कुणी समजायचे ?

....रसप....
२२ मी २०१३
http://www.ranjeetparadkar.com/2013/05/blog-post_22.html

Group content visibility: 
Public - accessible to all site users

वा रे जितू !!
अप्रतीम लय
प्रत्येक कडवे एकेका शेरासारखी मजा देतेय

अख्खी कविता ज्जाम आवडेश
धन्स या कवितेसाठी

अजून काय बोलू ?
हॅट्स ऑफ् !!!!!
_/\_