ध्यास असावा

तुझ्या नि माझ्या कणाकणाला एकपणाचा ध्यास असावा
उरात माझ्या दरवळणारा धुंद तुझा तो श्वास असावा

कधी रिमझिमत सभोवताली तूच अवेळी दाटुन यावे
कधी मुसळधार पावसाचा रात्रभराचा भास असावा

मनी अनामिक थरथर जेव्हा नजर तुझी गात्रात झिरपते
जखम नव्याने ठरून आहे धूसरसा अदमास असावा

अबोल वाळूवरी दिसावी भेट तुझी माझी सरलेली
उदासवाणे फिरावयाला तोच किनारा खास असावा

कशास नात्यास नाव देऊ शब्द जरी झालेत अनावर
नकोत स्पर्शातले भुलावे फक्त खुळा आश्वास असावा