कसा बेभरवशी निघाला भरोसा (नविन )

Submitted by ganeshsonawane on 22 March, 2013 - 07:53

कसा बेभरवशी निघाला भरोसा

जगी माणसाचा न वुरला भरोसा
कसा काय देवू कुणाला भरोसा?

गळा ऐनवेळीच कापून गेला
कसा बेभरवशी निघाला भरोसा

पहाताच लाटा सरकले किनारे
किनाऱ्या वरूनी उडाला भरोसा

तुझ्या वाचुनी रात्र सुनसान जाते
जपूनी उराशी दिलेला भरोसा

मला पाहुनी वाट बदलून गेली
तिचा काय होता निराळा भरोसा?

दिले तोंड बांधून संतास फाशी
पुराव्याविना व्यर्थ ठरला भरोसा

विसंबुन विठूवर कसा काय राहू ?
तयाचाच नाही तयाला भरोसा

Group content visibility: 
Public - accessible to all site users