(तस्वीर तरही) तुझ्यावर प्रेम माझे आणखी जडले!

Submitted by राजीव मासरूळकर on 19 February, 2013 - 03:10

पहिला प्रयत्न कृत्रिमतेत आणि तंत्रशरणतेत फसला , म्हणून हा दुसरा प्रयत्न.

तुझ्यावर प्रेम माझे आणखी जडले!

तळ्याकाठी किती पाणी , तरी झडले...
जसे हे झाड, माझेही तसे घडले !

मनाचा पोहरा विहिरीतटी ठेवुन
सभोती रान हिरवे हंबरुन रडले !

तुझ्या हातून माझा हात सुटला अन्
तुझ्यावर प्रेम माझे आणखी जडले !

परीक्षा पास झाले फार शाळेच्या
खऱ्‍या प्रश्नांस उत्तर द्यावया अडले !

मनूजा, गर्भ अंधारी सदा वाढे
प्रकाशा काय दुःखाचे तुझ्या पडले ...?

- राजीव मासरूळकर
दि १९.०२.२०१३
दुपारी १.१५ वाजता

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

तळ्याकाठी किती पाणी , तरी झडले...
जसे हे झाड, माझेही तसे घडले !

तुझ्या हातून माझा हात सुटला अन्
तुझ्यावर प्रेम माझे आणखी जडले !<<<

छान शेर आहेत.

(परत एक अटेंप्ट करण्याच्या दिलखुलास वृत्तीसाठी वेगळे अभिनंदन)

Submitted by बेफ़िकीर on 19 February, 2013 - 03:16

मनःपुर्वक आभार , डॉ साहेब.

'हो' भरीचा आहे खरोखर.

शेवटच्या शेरात 'प्रकाशा' हा शब्द प्रकाशाला अशाप्रकारे लक्षात घेतला तरच थोडाफार अर्थ कळणार. पुन्हा एकदा घोळ !

दुरूस्तीसाठी पुन्हा एकदा विचार करतो.

Submitted by राजीव मासरूळकर on 19 February, 2013 - 03:20

परत एक अटेंप्ट करण्याच्या दिलखुलास वृत्तीसाठी वेगळे अभिनंदन>>>> माझ्यातर्फेही
पहिले ३ खूप मस्तय्त
शाळेचा नाही आवडला
शेवटचा खयाल अतीशय उत्तम वाटला
हिरवे रान हंबरुन रडले >>मस्त कल्पकता

तुझ्या हातून माझा हात सुटला अन्
तुझ्यावर प्रेम माझे आणखी जडले !<<< माझ्यासठी हासिले गझल शेर या गझलेतला

Submitted by वैवकु on 19 February, 2013 - 04:10

शाळेबद्दलचा शेर आधी

शिकावे खूप... जग सारे... जरी वाटे
मला शाळेत जाणे फार हो नडले

असा होता.
तो आता पूर्णतः बदलून स्त्रीलिंगी केला आहे.

Submitted by राजीव मासरूळकर on 19 February, 2013 - 05:26