मौन माझ्या अंतरीचे बोलते माझ्यासवे
नेहमी पिंगा धरोनी खेळते माझ्यासवे
मौन आहे गीत माझे मौन माझा सूरही
मौन तारा अंतरीच्या छेडते माझ्यासवे
सांगण्या आनंद माझा कोण आहे आपुले?
मौन हाती हात धरुनी नाचते माझ्यासवे
खूप आले खूप गेले शेवटी मी एकटा
मौन करते साथ अंती चालते माझ्यासवे
वाढतो शब्दावरूनी शब्द हे आहे खरे
मौन उत्तर द्यावयाचे टाळते माझ्यासवे
काय मी केली कमाई? सांजवेळी प्रश्न हा
मौन, उरले काय हाती, मोजते माझ्यासवे
मौनव्रत घेऊन बसलो ईश्वराला प्रार्थण्या
श्रीहरी स्वप्नात झाले बोलते माझ्यासवे
प्रश्नचिन्हांचीच आहे मालिका जगणे जगी
मौन सार्या उत्तरांना शोधते माझ्यासवे
केवढे "निशिकांत" आहे वेड मौनाचे तुला?
मौन ना लढता झगडता नांदते माझ्यासवे
निशिकांत देशपांडे मो.क्र ९८९०७ ९९०२३
E Mail-- nishides1944@yahoo.com
..................
..................
.............
........
आधी मौनाने उत्तर द्यायचा प्रयत्न केला पण जमले नाही म्हणून मग शब्दानेच म्हणतो - मस्तच जमलीये
वाह सर! भक्तीपूर्ण मौन
वाह सर!
भक्तीपूर्ण मौन वाटले.. तुमची मौनावर, मौनाची तुमच्यावर श्रद्धा जणू... मौन सखा, तोच सोयरा!
काय मी केली कमाई? सांजवेळी प्रश्न हा
मौन, उरले काय हाती, मोजते माझ्यासवे>> वाह, कितीतरी सुरेख...
सांगण्या आनंद माझा कोण आहे
सांगण्या आनंद माझा कोण आहे आपुले?
मौन हाती हात धरुनी नाचते माझ्यासवे
खूप आले खूप गेले शेवटी मी एकटा
मौन करते साथ अंती चालते माझ्यासवे <<< व्वा ! >>>
आवडली गझल..
प्रश्नचिन्हांचीच आहे मालिका
प्रश्नचिन्हांचीच आहे मालिका जगणे जगी
मौन सार्या उत्तरांना शोधते माझ्यासवे
व्वा..!
अनुच्चारित अक्षरांनी गजबजून
अनुच्चारित अक्षरांनी गजबजून गेलंय मौन
कविता आवडली.
खूप आले खूप गेले शेवटी मी
खूप आले खूप गेले शेवटी मी एकटा
मौन करते साथ अंती चालते माझ्यासवे
प्रश्नचिन्हांचीच आहे मालिका जगणे जगी
मौन सार्या उत्तरांना शोधते माझ्यासवे<<<
शेर आवडले. गझलही.
धन्यवाद
छान आहे! आवडली
छान आहे! आवडली
फेसबुकावर वाचली होती असे
फेसबुकावर वाचली होती असे स्मरते आहे
आताही तितकीच आवडली