पावले ऋतूंची मीही पाहणे जरूरी होते!

Submitted by सतीश देवपूरकर on 9 November, 2012 - 22:59

गझल
पावले ऋतूंची मीही पाहणे जरूरी होते!
मी बरोबरीने त्यांच्या चालणे जरूरी होते!!

यायला निघाला होता मधुमास घरी माझ्याही....
मी घरात त्या वेळेला थांबणे जरूरी होते!

तो वहात गेला नुसता, वा-याने नेले तिकडे.....
समजले न त्या मेघाला बरसणे जरूरी होते!

एकेक रंध्र दरवळले, मोहरली काया सारी;
मी मनोगते स्पर्शांची समजणे जरूरी होते!

धावणे दूर, पण साधे चालता मला ना आले;
मी अंगरखा स्वप्नांचा दुमडणे जरूरी होते!

त्यामुळेच त्यांच्या गझला वाटल्या कागदी मजला;
शब्दांत गंध आत्म्याचा मिसळणे जरूरी होते!

केवढा गारठा आहे या हवेत वार्धक्याच्या;
मी ऊब तुझ्या स्मरणांची मुरवणे जरूरी होते!

वाटते सुधाही आता जळजळीत का हृदयाला?
कालचा विषाचा पेला विसळणे जरूरी होते!

...........प्रा.सतीश देवपूरकर
भूशास्त्र व खनिगतेलतंत्रज्ञान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

केवढा गारठा आहे या हवेत वार्धक्याच्या;
मी ऊब तुझ्या स्मरणांची मुरवणे जरूरी होते!

वाटते सुधाही आता जळजळीत का हृदयाला?
कालचा विषाचा पेला विसळणे जरूरी होते!

व्वा!!

तो वहात गेला नुसता, वा-याने नेले तिकडे.....
समजले न त्या मेघाला बरसणे जरूरी होते!
व्वा!!

बाकीचेही शेर आवडले.

Submitted by अ. अ. जोशी on 9 November, 2012 - 23:25

तो वहात गेला नुसता, वा-याने नेले तिकडे.....
समजले न त्या मेघाला बरसणे जरूरी होते!>>>>>>>छानच .
गझल आवडली.

Submitted by कमलाकर देसले on 10 November, 2012 - 11:26

वाह

Submitted by श्रावण१८ on 10 November, 2012 - 11:31