बरेच अवघड असते...........

असेच असते जाण माणसा जगणे म्हणजे
असूनही नसल्यागत असते असणे म्हणजे

मी तितकाही बुद्धू नाही बरका मित्रा
हीच हुशारी तुला शहाणा म्हणणे म्हणजे

किती घेतले किती सोडले हिशेब कसला
जसे घेतले तसे सोडणे..... श्वसणे म्हणजे

पाउस, अश्रू ,पारिजात ना अजून कोणी
मी तर केसांकडून शिकलो गळणे म्हणजे

तन मन धन माझे पण त्यावर तिची हुकूमत
असे कसे हे जीव कुणावर जडणे म्हणजे .........[>>>>>>>माझ्या मनाजोगता बदल सुचवल्याबद्दल धन्स टू सुप्रियातै !!]

जगून तर बघ माझ्यामध्ये कधी विठ्ठला
तुला कसे कळणार तुझ्यावर मरणे म्हणजे

करून दाखव 'तुझ्या'सारखा शेर वैभवा
बरेच अवघड असते 'सोपा' करणे म्हणजे !!

बरेच अवघड असते.......... 'सोपा' करणे म्हणजे !!