भस्म्यांची पंगत

भस्म्यांची पंगत

हे राव, ते राव,
या ना सगळे,
खा ना राव!
डोक्यास्नी लंगोट,
गेंद्याचं कातडं
पेव फुटलय,
खा ना राव!!
रस्ते खा!
पूल खा!
शस्त्र खा!
अस्त्र खा!
बापाचीच पेंड,
जरा निवांत खा!!

चारा खा!
भूखंड खा!
खनिज खोदून खा!
वाळू उपसून खा!
वाइच दमानं खा!

“आदर्श" ठेवा,
देशास गहाण ठेवा,
जागतीक बँकेचा मेवा
निवांत खावा!
सडू द्या गहू पाव्हणं,
जरा निवांत जेवा!!

देश थंड, प्रजा षंढ!
न्यायपालिका दंड!
भ्रष्टाचार उदंड!
काय नाय होत बंड!
चार घास दमानं खा!!

बोटी घ्या बोटी,
टुजी थ्रीजीच्या बोटी,
राजा झ्याक आचारी,
प्रधान दरबारी,
फक्कड जमलाय बेत,
जरा दमानं घ्यावा!!
अरे!
हाणा त्या कुत्र्यांना,
दृष्ट लागेल ना,
सर्वांना!
वंगळ साले,
केजरी, बेदी, आण्णा,
म्हणे लोकपाल आणा!
म्हणे लोकपाल आणा!!