पैलतिरीच्या नीलदिव्यांनो

Submitted by हर्षल वैद्य on 22 January, 2012 - 11:31

पैलतिरीच्या नीलदिव्यांनो
कुणास तुमच्या व्यथा सांगता
किंवा का मग कातरवेळी
अंतरगर्भी दडवू बघता

पैलतिरीच्या नीलदिव्यांनो
जलहलती प्रतिबिंबे तुमची
पृष्ठावरची खळबळ का हो
कथी स्पंदने तुमच्या मनिची

पैलतिरीच्या नीलदिव्यांनो
कशास हो एकाकी जळता
वाट पाहता कोणाची अन्
उत्तररात्री झुरून विझता

पैलतिरीच्या नीलदिव्यांनो
प्रकाश तुमचा कोणासाठी
घरटी परतू बघणाऱ्या का
सांजभारल्या पक्षिणिसाठी

पैलतिरीच्या नीलदिव्यांनो
पैलतिरावर दुनिया तुमची
चुकूनही कधि ऐलतिराच्या
मोजु नका प्रश्नांची उंची

पैलतिरीच्या नीलदिव्यांनो
एकदाच तुम्हि मजला सांगा
दिसतो का हो माझा साजण
पैलतिरीच्या नीलमरंगा

गुलमोहर: 
कविता
शेअर करा

पैलतिरीच्या नीलदिव्यांनो
एकदाच तुम्हि मजला सांगा
दिसतो का हो माझा साजण
पैलतिरीच्या नीलमरंगा>>>>मस्त.
आवडली.

Submitted by विभाग्रज on 22 January, 2012 - 11:47

"पैलतिरीच्या नीलदिव्यांनो
कशास हो एकाकी जळता
वाट पाहता कोणाची अन्
उत्तररात्री झुरून विझता" >>> हे आवडलं.

Submitted by UlhasBhide on 22 January, 2012 - 12:15

मस्त आहे कविता. आवडली.
>>>>पैलतिरीच्या नीलदिव्यांनो
पैलतिरावर दुनिया तुमची
चुकूनही कधि ऐलतिराच्या
मोजु नका प्रश्नांची उंची>>>> हे कडवं सगळ्यात छान जमलय.

Submitted by सीमा on 23 January, 2012 - 10:08