परतीचा सोबती..

त्याचं असं दूर जाणं,
भेटू केव्हातरी असं सांगून,
कुठेतरी नव्या क्षितिजांवर,
ओल्या देहानं मातीसवे
दरवळत राहणं.. चालायचंच !

आज तो परतणार आहे,
हो हो आज तो येणार आहे,
कालची थंडगार आभाळाची सावली,
हेच तर सांगत होती..
हळू हळू ओल्या चाहूलीची गर्दी,
अगदी शिवार ओलांडून पांगत होती..

पण आता तीच्यावाचून तो म्हणजे,
जुन्या जखमांवर ओली शिंपडच,
अन एकेका थेंबासोबत विरघळत जातो,
तो माझ्या हजार स्वप्नांचा खच..

बहाल मर्जीचा राजा तु,
आता तुला काय ते अडवावं,
पण निदान यंदाच्या मौसमात तरी,
परतीचा सोबती म्हणून तू मला निवडावं...

-नादखुळा