तुझे भास होते

Submitted by क्रांति on 15 May, 2011 - 05:54

कधी चांदण्याला तुझी आस होती
कधी श्रावणाला तुझे ध्यास होते
मला मात्र जन्मांतरी सोबतीला
तुझे स्वप्न होते, तुझे भास होते

निजेच्या क्षणी जोजवाया मनाला
तुझे शब्द होते, तुझे सूर होते
पहाटे जशी जाग आली, उशाला
तुझे स्वप्न होते, तुझे भास होते

गळा हुंदका दाटता सावराया
तुझा स्पर्श होता, तुझे हास्य होते
जरा एकटे वाटता साथ द्याया
तुझे स्वप्न होते, तुझे भास होते

फुलांना तजेला, कळ्यांच्या खळ्यांना
हसू वाटणारा तुझा गंध होता
झर्‍याला खळाळून लोभावणारे
तुझे स्वप्न होते, तुझे भास होते

समेला जशी दाद उस्फूर्त यावी
तसा या जिवाला तुझा छंद होता
दिली साथ आयुष्यगीतास ज्यांनी,
तुझे स्वप्न होते, तुझे भास होते

गुलमोहर: 
कविता
शेअर करा

जबरदस्त गेयता आहे....काय नादमाधुर्य आहे संपूर्ण कवितेत !!

सूचना :झर्‍याला खळाळून लोभावणारे...इथे लुभावणारे कसं राहील ? आगाऊपणाबद्दल क्षमस्व

Submitted by असो on 15 May, 2011 - 06:00

कधी चांदण्याला तुझी आस होती
कधी श्रावणाला तुझे ध्यास होते
मला मात्र जन्मांतरी सोबतीला
तुझे स्वप्न होते, तुझे भास होते

समेला जशी दाद उस्फूर्त यावी
तसा या जिवाला तुझा छंद होता
दिली साथ आयुष्यगीतास ज्यांनी,
तुझे स्वप्न होते, तुझे भास होते

सुंदर Happy

Submitted by अज्ञात on 15 May, 2011 - 06:32

नेहमीप्रमाणेच सुंदर कविता.
“निजेच्या क्षणी ……. तुझे भास होते”
हे सर्वात जास्त आवडलं.

Submitted by UlhasBhide on 15 May, 2011 - 09:19

अप्रतिम कविता....

कधी चांदण्याला तुझी आस होती
कधी श्रावणाला तुझे ध्यास होते
मला मात्र जन्मांतरी सोबतीला
तुझे स्वप्न होते, तुझे भास होते >> झक्कास.........

Hats-Off-Dnn.jpg Hat’s Off To You…

Submitted by धनेष नंबियार on 15 May, 2011 - 10:29

समेला जशी दाद उस्फूर्त यावी
तसा या जिवाला तुझा छंद होता>>>

व्वा व्वा क्रान्ती!

सगळीच कविता सुंदर आणि स्पेशल 'क्रान्ती स्टाईल" ही!

(अवांतर - आयुष्यात जे हवे ते न गवसल्याचे आणि ' काहीसे ' निराश झाल्याचे भाव आपण अत्यंत हृदयद्रावक पद्धतीने मांडता. पण एक बोलू का? म्हणजे आपला एक सह-कवी म्हणून! हे भाव आपल्या गझलेत, कवितेत अनेकदा आले. आणि हे वाचून असे वाटते की 'जेव्हा आयुष्यात सप्तरंग होते आणि त्यातला एकेक रंग 'वजा' व्हायला लागला' त्या कालावधीतील कविताही आपण इतक्याच समर्थपणे द्याल आम्हा वाचकांना! वाचाव्याश्या वाटत आहेत आपल्या 'साकारात्मक' रंग असलेल्या कविता!)

अधिक उणे बोललो असल्यास मनापासून माफी !

पण मला यावेळेस तुमचा मुद्देसूद प्रतिसाद हवाच आहे. हा हवे तर आपल्यापेक्षा कमी वयाच्या माणसाचा बाल - आग्रह समजावात!

-'बेफिकीर'!

Submitted by बेफ़िकीर on 16 May, 2011 - 14:55

खूप सुंदर!! सारीच कविता अप्रतिम!! कळ्यांचे खळे ही किती सुंदर कल्पना!!

समेला जशी दाद उस्फूर्त यावी
तसा या जिवाला तुझा छंद होता>>>>व्वा!!

Submitted by के अंजली on 17 May, 2011 - 12:00

गझलेनं सोडलं नाही ना?

दिली साथ आयुष्यगीतास ज्यांनी,
तुझे स्वप्न होते, तुझे भास होते...खुपच प्रामाणिक!!!!

Submitted by -शाम on 18 May, 2011 - 22:39