कधी उगाचच..

Submitted by श्यामली on 11 May, 2011 - 08:22

कधी उगाचच असे वाटते व्हावे सुरेल गाणे..
कधी उगाचच कसे वाटते व्हावे उदासवाणे?
कधी उगाचच कशी पडावी जगावेगळी स्वप्ने?
कधी उगाचच बरे वाटते भ्रमात ऐसे जगणे
कधी उगाचच वाटे असे की, जवळ कोणी असावे
कधी उगाचच वाटे असे की दूर स्वत:ला न्यावे;
कधी उगाचच हवी वाटते ग्रीष्मामधली तृष्णा
कधी उगाचच जाळत रहातो चांदण्यातला उष्मा
कधी उगाचच कसे रुणझुणे पायातील पैंजण
आणि उगाचच असे वाटते भेटून गेला साजण..
कधी उगाचच असे वाटते चंद्र लपेटून घ्यावा..
कधी वाटते आकाशातल्या ता-यावर झोका घ्यावा
कधी उगाचच झूठ वाटती कवितेमधल्या ओळी
कधी उगाचच डोळा पाणी सांजभारल्या वेळी..
कधी उगाचच...कधी उगाचच...

गुलमोहर: 
कविता
शेअर करा

>> कधी उगाचच झूठ वाटती कवितेमधल्या ओळी
कधी उगाचच डोळा पाणी भरदुपारच्या वेळी..

व्वा!!

Submitted by zaad on 11 May, 2011 - 08:51

ए श्यामली, किती हळूवार, सुंदर भाव आहेत तुझ्या कवितेत... मनातली अनिश्चितता, सैरभैरपणा मस्त शब्दबद्ध केला आहेस. लय पण छान आहे कवितेची. Happy

Submitted by सानी on 11 May, 2011 - 10:29

उगाचच ..... एका स्वछंदी कलाकाराचा मनस्वीपणा समर्पक शब्दात व्यक्त झाला आहे.

Submitted by सखीप्रीया on 11 May, 2011 - 10:56

कधी उगाचच झूठ वाटती कवितेमधल्या ओळी
कधी उगाचच डोळा पाणी भरदुपारच्या वेळी..
वावा!!! Happy

कधी उगाचच जाळत रहातो चांदण्यातला उष्मा असं ना? की चांदण्यातही सुद्धा चालेल?
चुभुद्याघ्या.

Submitted by आनंदयात्री on 11 May, 2011 - 12:23