तमाशातला राजा

आयुष्य हाच तमाशा
जीवनाचा रंगमंच
सोंगातला राजा तो
सोंगातलाच प्रपंच

काढताच रंगीत कपडे
राजा येथे होतो भिकारी
ठेवताच शस्त्र खाली
सावज होतो शिकारी

सिंहासनी बसला तरी
आत आतडी रिकामी
आज्ञा देतो तो मोठ्या
पण बोलणे निकामी

या गावातून त्या गावाला
फिरतोचा आहे तांडा
म्हातारा झाला आता तो
काल होता तरणाबांडा

राणीही फिरतेच आहे
दागीण्यांचा भारी बाज
चिंध्यामधेच लपवीते
पडद्यामागे तिची लाज

मागतो आहे राजा
कोणापाशी उधार बिडी
सारे आयुष्यच त्याचे
झाले आहे सापशिडी

-हरीश दांगट