मग ठरवू सावकाश...

तुझ्या माझ्यातील आदिम बंधावर
कुठलेही संस्कार होण्याआधी
मला तुला खोल मिठीत घेऊ दे...

ओठांना ओठांनीच जाणवू देत
आत उसळणा-या रक्ताचे उष्ण प्रवाह,
हळूहळू नष्ट होऊ देत सभोवतालचं समग्र अवकाश...
रक्तात उतरलेल्या उत्क्रांतीच्या सर्वच खूणा
नाहीशा होऊन रक्त पुन्हा पोचू दे
त्या आदिम बिंदूपाशी जिथून ते पहिल्यांदा
वाहू लागलं स्पर्शांच्या चुंबकीय धमन्यांतून...
दोन जीवांना एकजीव करणा-या लिपीचा
सृष्टीत शोध लागला
त्या बिंदूवरून ओसरत खाली येताना
मग ठरवू सावकाश
या नात्याचं नाव काय?
या नात्यातले शिष्टाचार कोणते?
या नात्याची संस्कृती कुठली?

तुझ्या माझ्यातील आदिम बंधावर
कुठलेही संस्कार होण्याआधी
मला तुला खोल मिठीत घेऊ दे...