कृष्णा पुरे (गवळण)

कृष्णा पुरे थट्टा अशी नाही रे बरी
वाट नको अडवू मला जाऊ दे घरी !

फोडुनी माठ साडी भिजवी भरजरी
केलीस खोडी आता नाहि का पुरी,
मारिल रे सासु माझी रागिट भारी
वाट नको अडवू मला जाऊ दे घरी,

भर मध्यान्ह झाली घट डोइवरी
चढुनी घाट धाप लागली उरी,
संगतिला नाही कुणि ऐक श्रीहरी
वाट नको अडवू मला जाऊ दे घरी,

धरु नको पदरा भर रस्त्यावरी
संसारी आग कुणी लाविल हरी,
थकले रे नन्दलाला विनवुनी परी
वाट नको अडवू मला जाऊ दे घरी,

बोलिले कान्हा राग धरू नको मनी
तुझिया चरणाविण नाही रे गती,
चरण धरुनी राधा विनविते परोपरी
वाट नको अडवू मला जाऊ दे घरी.