विषवल्लरी

विषवल्लरी.

\
\

\
\

हो हेच नाव आहे या फ़ुलांचे. हे नाव वाचून मनात जी काहि प्रतिमा उभी राहिल, त्याच्याशी अगदी फ़टकून असतात हि फ़ुले. तशी हि वेल एरवी अगदी साधीसुधी दिसते. पानेही साधीच. पानांचा रंगही निस्तेज, हिरवा.

वेल मात्र खुपच पसरलेली असते. दांडे मजबूत असतात. पण तरिही लक्ष वेधून घेण्यासारखे काहि नसते. पण एकदा का फ़ूलावर आली कि मात्र नजर हटूच शकत नाही, हिच्यावरुन.

हे असे ओंजळभर फ़ुलांचे गुच्छ, जागोजाग लटकत असतात. रंग अगदी पांढराशुभ्र. उन्हातही फ़ुले अशीच टवटवीत असतात.

आकार तरी किती देखणा. पाकळ्यांचा द्रोण झालेला. खरी वाटू नयेत, इतकी देखणी. अगदी मंदसा सुगंधही असतो. या रंगावरुनच हिला दुधळी असेही नाव आहे.शास्त्रीय नाव Vallaris solanacea .

आपल्याकडे क्वचित दिसत असली तरी उत्तर भारतात हि विपुल आहे. मी पुण्याला कोथरुड भागात एका बंगल्याच्या कुंपणावर हि बघितली होती. राणीच्या बागेत सिंहाच्या पिंजर्‍यावर आहे.

पण या वेलीला विषवल्लरी हे नाव का पडलय. खरेच विषारी आहे का ? याबाबत मला काहि कळले नाही. एरवी माझ्या बहुतेक फ़ुलांच्या फ़ोटोत, मधमाश्या, मुंग्या वगैरे फ़ुलावर असलेल्या दिसतात, या फ़ोटोत तसे काहि किटक दिसत नाहीत. रंग पांढरा आहे म्हणजे कदाचित, रात्री उडणारे किटक यांचे परागीभवन करत असावेत.

पण वरच्या फ़ोटोकडे बघून तरी, ही विखारी वाटत नाही.