अवघी विठाई माझी (१५) - चायनीज कॅबेज (नापा कॅबेज)

पूर्वी अनेक वेगळ्या शब्दांच्या मागे चिनी हा शब्द जोडला, कि त्यापुढे स्पष्टिकरण
द्यावे लागत नसे. उदा, जमिनीलगत पसरत जाणार्‍या एका राणी रंगाच्या फ़ूलाला,
चीनी गुलाब म्हणत असेन. चिनी वैद्यक, चिनी दंतवैद्य, चिनीमातीच्या बरण्या, चायना
सिल्क, असे बरेच काही.त्यांचे वेगळेपण या "चिनी" शब्दातून दिसत असे.

आता तर दुनियाभरचे बाजार, चिनी वस्तूंनी खचाखच भरलेले दिसतात.
तसाच हा एक प्रकार म्हणजे चिनी कोबी किंवा चायनीज कॅबेज. दिसायला देखणी असणारी
हि भाजी, सहज लक्ष वेधून घेते. पोपटी चमकदार रंगांची पाने आणि पांढरेशुभ्र जाड देठ, असे
हिचे रुप असते. या भाजीत गडद हिरवा रंग तसेच चमकदार पिवळा रंगही असतो, हि भाजी
बरेच दिवस आपले हे ताजेतवाने रुपडे टिकवून असते.
याची पाने कोबीच्या पानासारखीच पण जरा सैल बांधणीची असतात. आतली पाने फ़िक्कट
पिवळ्या रंगाची असतात. पाने कच्चीच सलादमधे वगैरे वापरता येतात, तर देठ शिजवून
भाजीत वापरता येतात.

मी वरच्या डीशमधे ती जिरा फ़्राइड राईसबरोबर वापरलीय. जिरा राईस करताना, थोडी
हळद वापरलीय, त्यामूळे तो पिवळा रंग आलाय. बाजूने या चिनी कोबीची पाने, बारिक
कापून ठेवली आहेत. भातावर सजावटीसाठी सुकवलेल्या क्रॅनबेरीज आणि कोथिंबीर आहे.
भाताचा मऊ पोत आणि या कोबीच्या पानाचा करकरीतपणा, यांचा एकत्र मेळ छान
जमला होता.

या भाजीचे देठ आणि पानेही, इथे स्टर फ़्राय करुन वापरली आहेत. स्टर फ़्राय करताना
सोया सॉस, लसूण, हिंग आणि मिरपूड वापरली आहे. मध्यभागी याच भाजीची आतली
कोवळी पाने, बारिक कापून ठेवली आहेत, वर थोडेसे केचप आणि कोथिंबीरीचे पान आहे.
हि भाजी शिजवून अगदी मऊ करु नये, म्हणजे तिचा स्वाद टिकून राहतो. याबरोबर
टोफू आणि इतर भाज्याही वापरता येतील.

चायनीज कॅबेज म्हणण्यापेक्षा याला नापा कॅबेज म्हणणे जास्त योग्य होईल. (चायनीज
कॅबेज म्हणून आणखी एक भाजी असते, त्याची ओळख पुढच्या भागात.) याचे शास्त्रीय नाव
Brassica rapa, म्हणजे कूळ कोबीचेच. चीन, जपान आणि कोरिया मधे ही भाजी
लोकप्रिय आहे.

याची मोठी पाने, फिश आणि मटणासाठी रॅप म्हणून पण वापरता येतात. याचा स्वाद बराच
सोम्य असतो. पण रंग छान असतो. यात क जीवनस्त्व, कॅल्शियन, मॅंग्नेशियम, सोडीयम
असते.