केवढे चालणे हे मजल दरमजल.....

Submitted by बेफ़िकीर on 23 March, 2010 - 06:25

केवढे चालणे हे मजल दरमजल...
काय जाणे कुणी आखली ही सहल

मी कितीदातरी ओळ खोडायचो
अन तुझ्याहीमधे व्हायचे मग बदल

काय दुर्लक्ष हे पाहिल्या पाहिल्या...
का अशी घेत आहेस माझी दखल?

खूप थैमान मी घातले याइथे
सांगण्यासारखी एक नाही गझल

मानवी आज योनी ... उद्या वेगळी
ही रहस्ये उकल ती रहस्ये उकल

विश्व ओलावल्यासारखे वाटते
पापण्यांच्यामधे एक पडदा तरल

सागरासारखी लोचने बोलली
गाठ तळ, गाठ तळ, 'बेफिकिर' आत चल

गुलमोहर: 
मराठी गझल
शेअर करा

केवढे चालणे हे मजल दरमजल...
काय जाणे कुणी आखली ही सहल

कितीही दीर्घ असो आयुष्याची सहल ,अशा कविता आहेत तोपर्यंत कंटाळवाणी वाटत नाही..
फार आवडली गझल.

Submitted by भारती.. on 3 March, 2013 - 07:23

Pages