अवघी विठाई माझी (२३) सलाद ग्रीन्स

पाश्चात्य जेवणात ग्रीन्सचे स्थान महत्वाचे आहे. आपल्याकडे मेथीच्या पानांची, किंवा मूळ्याच्या पानांची पछडी असे काहि अपवाद सोडल्यास, हिरव्या भाज्या कच्च्या खाण्याची परंपरा नाही. आपल्याकडची आहारपद्धती लक्षात घेतल्यास, आपल्याला आपल्या नेहमीच्या आहारातून, भरपूर चोथा मिळत असतो. त्यामुळे मुद्दाम कच्ची पाने खायची रित नाही.
पाश्चात्य जेवणात मात्र, मैद्यासाखरेपासून केलेले पदार्थ, पास्ता आणि मांस यांवर भर असल्याने, त्यांना सलाद खाणे आवश्यक असते.

सलाद जेवणाच्या सुरवातीला, मुख्य पदार्थ वा जेवणानंतर गोड पदार्थ म्हणून पण खाल्ले जाते.
सलाद मधे अनेक प्रकारची हिरवी पाने आणि त्यासोबत इतर कच्च्या भाज्या (काकडी, टोमॅटो, कांदा, गाजर ) काहि शिजवलेल्या भाज्या (बीट, बटाटा, बीन्स ) चीज, फळे (सफरचंद, संत्री )नट्स तसेच ब्रेडचे तूकडे, उकडलेली अंडी, चिकन, बीफ हे पण घेतले जाते. तूम्ही सलाद कुठल्या हेतूने खाताय त्यावर हे ठरते.

सलादमधे ड्रेसिंगला पण महत्व आहे. फ्रेंच ड्रेसिंग, मेयॉनीज, लिंबाचा रस, क्रीम वगैरे यात वापरले जाते.

सलाद नेहमी थंडच खाल्ले जाते. (अपवाद पोटॅटो सलाद ) यातली पाने स्वच्छ धुवुन कोरडी करायची असतात. त्यासाठी खास उपकरण मिळते. जाळीदार टोपलीत सलादची पाने घालून, दोरीला बांधुन ती टोपली गरगर फिरवून पण पाणी काढीत असत. सलादची पाने चिरण्यापेक्षा त्यांचे हाताने तूकडे करणे योग्य ठरते.
सलादची पाने हि ताजीच मिळतात (सुकवलेली वा फ्रोझन नाही ) आणि ती शक्यतो ताजीच खायची असतात. ती जर कोमेजली असतील, तर थोडा वेळ लिंबू रस घातलेल्या पाण्यात ठेवली तर परत टवटवीत होतात. पण ती फ्रीजमधे ठेवायची असतील तर केळ्यासारख्या फळांच्या सोबत ठेवू नयेत.

सलाद ग्रीन्समधे प्रामुख्याने चोथा. अ व क जीवनस्त्वे, व थोड्या प्रमाणात खनिजे असतात.

सलाद ग्रीनमधे अनेक वनस्पतींचा समावेश होतो. बेबी स्पिनॅच, एन्डाइव्ह, कॉस, रॉकेट, दांडेलिऑन, बेबी चार्ड, बेबी पाक चोई, लेट्यूस, आईसबर्ग लेट्यूस, वॉटरक्रेस, बटरहेड असे अनेक.

पण मला वाटते, सलादमधील रंगसंगती, त्यातील घटकांचा ताजेपणा, तसेच आकारमानाच्या मानाने अत्यंत कमी कॅलरीज, यामूळे सलाद खाताना, एक मानसिक समाधान वाटते.
पुरावा म्हणुन हे सलाद बघा.

यात मी, कडेने लाल नेविल संत्र्याच्या पातळ कापा लावल्या आहेत (या सालासकट खाता येतात.)
त्यावर सफरचंदाच्या अत्यंत बारिक काड्या ठेवल्या आहेत. त्यावर मिश्र ग्रीन्स, त्यात स्वीट कॉर्न, आणि काही फूले ठेवली आहेत. ड्रेसिंग म्हणून फक्त संत्र्याचा रस टाकला आहे.
बघा आहे कि नाही, नजरेलाही सुखावणारी डिश ?

सर्व वाईट (वा चांगल्या, म्हणू शकतो ना ?) गोष्टींचा शेवट व्हावा असे म्हणतात. तसाच या लेखमालिकेचाही समारोप इथे करतोय. यापेक्षा वेगळ्या व नवीन भाज्यांची चव घ्यायला मिळाली तर लिहिनच.
शिवाय उद्यापासून गणपति बाप्पा यायचेत. त्यासाठी पण वेळ हवा. तेंव्हा म्हणा
गणपति बाप्पा मोरया !!