प्रेम पत्र

भावनांनी शब्दांच्या वेशीला शिवलं होतं,
कधी काळी तुझ्यासाठी प्रेमपत्र लिहीलं होतं..

ओळख, मैत्री, जिवलग मैत्री बरीच नाती झाली,
आता पुढे काय? विचारायची वेळ आली,
कसं विचारु म्हणता म्हणता मला हे सुचलं होतं
कधी काळी तुझ्यासाठी प्रेमपत्र लिहीलं होतं..

काय असावं-नसावं, पत्रात काय सांगावं बोलावं?
स्तुती-स्मृतींच्या सुमनांना कुठल्या तराजूत किती तोलावं?
सारं सारं काही मला प्रेमाने शिकवलं होतं
कधी काळी तुझ्यासाठी प्रेमपत्र लिहीलं होतं..

मग कुणी सांगितलं कागदाला गुलाबी रंगवावं,
दरवळणार्‍या शब्दांना मनाचं अत्तर लावावं,
सगळं काही करुन तुझ्यात बॅगेत सरकवलं होतं
कधी काळी तुझ्यासाठी प्रेमपत्र लिहीलं होतं..

भेट सांगणं, थेट विचारणं, त्यापेक्षा पत्रच बरं.
तयारच होतं तुझ्याकडे पोचायला माझं वेडं वारं.
तुझं गंधीत उत्तर फक्त मिसळायचं राहीलं होतं
कधी काळी तुझ्यासाठी प्रेमपत्र लिहीलं होतं..