बॉम्बस्फोटाचे अभंग

Submitted by SHANKAR_DEO on 14 July, 2011 - 02:35

दादा बाबा आबा l तुम्ही का थंडोबा l
हा खेळ खंडोबा l कुठवरी ll
बांधली आघाडी l तरी टोळधाडी l
कातडी हो जाडी l सत्तेमुळे ll
सत्तेमध्ये खोट l म्हणून हे स्फोट l
अंगावरी कोट l मळेचिना ll
खाकी वर्दी मिळे l लाख लाख गिळे l
रक्त भळभळे l निष्पापांचे ll
खुली मुंबापुरी l वडा पाणीपुरी l
कांदापोहे वरी l खाऊ घाला ll
तुरुंगी कसाब l चापतो कबाब l
किरकोळ बाब l बॉम्बस्फोट ll
दादा आवरेना l आबा सावरेना l
बाबा बावरेना l कशानेही ll
कसे जगायाचे l कसे तगायाचे l
आता बघायाचे l कुणाकडे ll
तुम्ही केली पूजा l परी भाव दुजा l
आमचीही सजा l संपे कधी ll
नासली ही गंगा l तुझी पांडुरंगा l
शब्दांचा ही दंगा l व्यर्थ आहे ll

गुलमोहर: 
काव्यधारा
शेअर करा

वा व्वा !

Submitted by मुक्तेश्वर कुळकर्णी on 14 July, 2011 - 03:34

बॉम्बस्फोटाचे अभंग पुन्हा लिहिण्याची वेळ न येवो हीच पांडुरंगाचे चरणी प्रार्थना. >>>> खरे आहे. पण शक्यता कमीच.

Submitted by चाणक्य. on 14 July, 2011 - 09:57

अभंग.....दुभंगलेल्या परिस्थितीला...सावररे पांडुरंगा रचना आवडली

Submitted by विनीता देशपांडे on 18 July, 2011 - 02:42