कवितेवरच्या कविता

सुरूवात करू का ? माझीच कविता आहे ही

मज दर्शन दे हे कविते..

मैलोमैलींचे रण पेटते
उजाड वाटा शोधत फिरते
निष्पर्ण बनी विनविते
मज दर्शन दे हे कविते.. | १ |

घनजलदांची वर्दी होती
दामिनींची गर्दी होती
परि.. कोरडीच मी फिरते
मज दर्शन दे हे कविते.. | २ |

भरूनी वाहे यमुनामाई
रानी माझ्या ओलही नाही
मी मिटुनि डोळे रडते..
मज दर्शन दे हे कविते |३ |

ओळखीचे सूर पाव्याचे
गंधित गाणे नील कान्ह्याचे
मी निळाईत त्य़ा भिजते
मज दर्शन दे हे कविते.. | ४
|

संध्या
०३ जुलै २०१०

तुमची कवितेवरची कविता ...येऊ द्या ना इथे

रूसली ही पोर तिच्या.. भावनांना वाव नाही.

ही पोर ( कविता) रूसली म्हणून खरडलेय काहीतरी ..

कुठूनी उतार नाही
कुठूनी चढाव नाही
रूसली ही पोर तिच्या
भावनांना वाव नाही

तोच तोच दिवस रोज
विसाव्याची बात नाही
गंधाळिल्या मोग-याची
पुन्हा तशी रात नाही

साचलेल्या पाण्याला या
कुठूनी प्रवाह नाही
रूसली ही पोर तिच्या
भावनांना वाव नाही

उन्हाने जो गेला पारा
आरशाला भाव नाही
आठवांची सांज होई
आसवांचा ठाव नाही

खुलले ना शेर माझे
गझलेला दाद नाही
हरविले शब्द माझे
माझी मला याद नाही

याद नाही दाद नाही
कवितेचे नांव नाही
रूसली ही पोर तिच्या
भावनांना वाव नाही

संध्या
०३ ऑक्टोबर २०१०