आजचा दरबार

महाराज - हे काय प्रधानजी आज आम्ही आलो तरी आपलं लक्ष नाही

प्रधान - माफ करा महाराज डोक्यात पेपर होता

महाराज - काय ?

प्रधान - पेपरात डोक होतं

महाराज - आज आमच्या आधीच आपण पेपर वाचताय

प्रधान - हो, कारण आज आपण आमलेट खाता खाता रमलात आणि `आम' जनतेला विसरून'`लेट' झालात

महाराज - आम्ही महाराज आहोत ... थोडं मागे पुढे होणारच

प्रधान - महाराज आपल्या ह्या मागे पुढे करण्यामुळे, होण्यामुळे ... जनतेचे टाईम टेबल विस्कटतयं त्याचं काय

महाराज - अस्सं झालं तरी काय ... भुकंप झाला की आभाळं कोसळलं.

प्रधान - ह्यापेक्षा ही भयंकर ... महागाई आभाळाला भिडलेली होतीच, आता ती आभाळ फाडून वर गेली. पगारवाढ रोडावलेय, इंधन दरवाढ मारूतीच्या शेपटीसारखी लांब लांब होतेय. टॅक्सी, रिक्षा बघितली कि गरीबाचा खिसा थरथरतोय आणि बिचारा दमला भागला जीव मिळेल त्या बसला लोंबकोळतोय. त्याचं ही तिकीट दर वाढणार म्हटल्यावर .... माणसाला तंगड्या तोडतच घर गाठावं लागणार.

महाराज - प्रधानजी, चालण्याचा व्यायाम चांगला असतो.

प्रधान - महाराज, हे तुम्ही बोलताय. काल जेवल्यावर शतपावली म्हणून राजवाड्याच्या गेटपर्यंतच गेलात आणि तुम्हाला धाप लागली .... तिथेच फतकन मारून बसलात ... शेवटी सेवकांकडून पालखी मागवलीत, आणिवाड्यात परत आलात.

महाराज - ते अचानक आमची प्रकृती खराब झाली.

प्रधान - तुमची अचानक तब्बेत खराब झालेय ... पण गेले काही दिवस राज्याची तब्बेत बिघडलेय त्याचं काय.

महाराज - हवामान बदलेलं तशी ... राज्याची तब्बेत पण सुधरेल की.

प्रधान - महाराज, जो पर्यंत राजदरबारी लोकं जातीने जनतेकडे लक्ष घालीत नाहीत तोपर्यंत राज्याची तब्बेत सुधरेल असं मला तरी वाटत नाही.

महाराज - मग आता ह्या क्षणी आम्ही काय करायला हवं.

प्रधान - वाढत्या महागाईला आळा घाला. आतापर्यंत सर्वसामान्य माणूस वडा-पाव तरी सुखाने खात होता तो ही आता महाग झालाय.

महाराज - काय ? वडापाव सुध्दा महाग झाला. का ?

प्रधान - कारण रॉकेल, गॅस, जीवनावश्यक ज्या ज्या म्हणून गोष्टी आहेत ते ते सर्व महाग झालं म्हणून

महाराज - ठीक आहे. प्रधानजी आम्ही जातीने लक्ष घालून यावर तोडगा काढू. तुर्तास ...

प्रधान - तुर्तास काय महाराज ...

महाराज - आमचं भविष्य वाचून आम्हाला सांगा `आजचा दिवस' आम्हाला कसा आहे. दिवस चांगला असेल तरच आम्ही ठोस पावलं उचलू. कितीही झालं तरी हा जनतेचा प्रश्न्न आहे. आणी आम्हाला तो सोडवावाच लागेल.

प्रधान - वा !! महाराज ३ रुपयाच्या पेपरात तुम्हाला तुमचं भविष्य कसं आहे हे कळणं फार महत्त्वाचं वाटलं ....

महाराज - अर्थात ... शेवटी निर्णय आम्हाला घ्यायचाय काय ? वाचा भविष्य वाचा.

प्रधान - आजचा दिवस छान आहे. पण आज शक्यतो ... प्रवास टाळा. आज उत्तम मेजवानीचा दिवस आहे. तेव्हा त्याचा आस्वाद घ्या.

महाराज - पाहीलतं ... प्रधानजी. आमची इच्छा असूनही आम्ही जनतेचा प्रश्न्न सोडवू शकत नाही. तेव्हा जा. आपल्या आचारीला आज आमच्यासाठी गावठी कोंबडी आणि वड्याचा बेत करायला सांगा. उगाच भविष्य चुकीचं ठरायला नको. काय ?

प्रधान - जी महाराज.

महाराज - आणि हो ... दरबार आज बंदच ठेवा

प्रधान - पण सगळे आता येतीलच महाराज

महाराज - सांगा, महाराजाची तब्बेत ठीक नाही. उद्या भेटू

प्रधान - आणि जनतेचे प्रश्न्न, तक्रारी त्यांची गार्‍हाणी

महाराज - ते तर पहिले सोडवायचे ... उद्याचा पेपर आला की माझं भविष्य वाचून ठरवू, काय ?

प्रधान - पण मला कळलयं येत्या ५ तारखेला जनतेने महागाई विरोधात देशव्यापी बंद पुकारलाय.

महाराज - अरे वा !! मग चांगलचं आहे. ते तरी हक्काने आराम कधी करणार. वा, खरचं मला आवडला जनतेचा निर्णय. ग्रेट

- देवनिनाद