आठवण

आठवणी शाप असतात की वरदान कळत नाही.
पण जेव्हा तुझी आठवण येते........
वाटतं आठवणी म्हणजे वठलेल्या, वयोवृद्ध पिंपळावरचं एकुलतं एक, हिरवं, झाडाच्या शेंड्यावर उभं असलेलं सदाच हिरवं कंच रहाणारं पान.
रोजच्या छोट्या, छोट्या घटनांचही हलकसं वारं, श्वासांचे अविरत झोत यांनी फडफडून लुसलूसणारं, आपल्या इवल्याशा अस्तित्वाची जाणीव करून देणारं, हिरवं चुटूक पिंपळपान म्हणजे आठवण.
खरं तर त्या अवढव्य झाडामध्ये आता जगण्याचं त्राण उरलेलं नसतचं. एकुणएक काडी मोजून घावी इतकं खुडूक झालेलं ते झाड. पण शेन्ड्यावर सळसळणार्‍या त्या एकाच पानाकडे पाहून ते झाड तोडायला कोणाचा जीवच धजत नाही.
असं एक गोंडस, निरागस पान म्हणजे तुझी आठवण.