नवरात्र

आज सकाळी सकाळमध्ये विवेक सरपोतदार यांचा 'नवदुर्गांची औषधी रूपे' हा अतिशय मोलाचा लेख वाचला आणि त्याचं सार काव्यरूपात मांडून नवरात्रात अंबेच्या चरणी आजची माळ अर्पिली.

प्रथम दुर्गा शैलपुत्री, अमृता
श्रेयसी, आरोग्यदायी सर्वथा

द्वितीय दुर्गा ब्रम्ह्चारिणि शारदा
स्वर मधुर करि, स्मरण वाढवि सर्वदा

तृतिय दुर्गा चंद्रघंटा पूजिता
लाभते आरोग्य हृदया रक्षिता

ही चतुर्था, नाम कुष्मांडा असे
रुधिर रक्षी, देत संजीवन असे

स्कंदमाता पार्वती ती पाचवी
कफविकारा, वात-पित्ता घालवी

अंबिका, कात्यायनी षट् रूपिणी
कंठरोगा घालवी मधुभाषिणी

सप्तमा ही कालरात्री योगिनी

आज घटस्थापना. नवरात्रासाठी माय जगदंबा घरी आली, तेव्हा तिचं जे रूप दिसलं त्याचं जमलं तसं वर्णन केलं.

नवरात्र जागवित आली घरी पाहुणी
माय अंबिका देखणी || धृ ||

मांडते मी चंदनी पाट
काय आईचा वर्णू थाट
भरजरी कुसुंबी काठ, हिरवी पैठणी
माय अंबिका देखणी || १ ||

गळा शोभे माळ पुतळ्यांची
कानी कुडी मोती-पोवळ्याची
पैंजणे सोनसाखळ्यांची, रत्ने कंकणी
माय अंबिका देखणी || २ ||

साज सोन्याचा बावनकशी
चंद्रहार, वजरटिक, ठुशी
हिरकणी शोभली कशी सोन्याच्या कोंदणी
माय अंबिका देखणी || ३ ||