आख्यायिका

मागील आठवड्यात कुंभलगड आणि उदयपूर ह्या राजस्थानमधील २ ठिकाणांना भेट दिली. जसे आपल्याकडे शिवाजी महाराज ह्या नावाविषयी जिव्हाळा आहे तसे तिथे महाराणा प्रताप ह्या व्यक्तीसाठी आहे.

एका वस्तु संग्रहालयात त्या काळची चित्रे, वस्तु ह्यांचे जतन करण्यात आलेले आहे. एका चित्रांच्या दालनात राणी पद्मिनीचा जोहार, पन्ना दाईचे लहानग्या उदयसिंह ला वाचविण्यासाठी स्वतःच्या बाळाचे दिलेले बलिदान, हल्दी घाटीची सुप्रसिद्ध लढाई, चेतक घोड्याचा मृत्यू ह्या विषयावरील चित्रे दिसली. त्यामागचा इतिहास अगदी थोडक्यात लिहिला होता. शालेय जीवनात हा सर्व इतिहास वाचल्याचे स्मरते. पण कालपरत्वे सर्व विसरायला झाले आहे.