आभाळातून खाली आल्या नक्षत्रांच्या धारा
पानाआडून कोण छेडितो सातारीच्या या तारा

निळसर हिरवे डोंगर दिसती धूक्यात गाती वाटा
अजुन काही गूज सांगतो पायामधला काटा
ओले ओले आभाळ झाले कानी गुंजतो वारा
पानाआडून कोण छेडितो सातारीच्या या तारा

रिन्गण धरती थेंब टपोरे झिम्मड नाचे पाणी
ओठावरती फुलून आली जुनी रेशमी गाणी
एकटाच मी कसा वेचू ग वाटेवरल्या गारा
पानाआडून कोण छेडितो सातारीच्या या तारा

पाऊसधारा अशा येऊनी छळून जाती दूर
आठवणींचा झरा केशरी गातो हळवे सूर
आरसपानी कुठे मनीचा हरवून गेला पारा
पानाआडून कोण छेडितो सातारीच्या या तारा