वाट ईथे स्वप्नातील....!

वाट हिरवी शेतांची
धुंद प्रवास प्रेमाचा
घट्ट बिलगले पाठी
वेग सुखद मनाचा

वारा कापीत जाई
वेग गाडीचा भन्नाट
सळसळते पौरूष
होई दर्शन विराट

हिंदकळते शरीर
गोड शिरशिरी येई
डोके ठेऊन खांद्याशी
गोड चावा कानी घेई

वाट चित्र जणू छान
सूर्यफुलांची सलामी
तुझे प्रेम जणू वेग
कसे थांबवू तुला मी?

थोडे पुंजके ढगांचे
बाकी निळाईच फार
वाट हिरवा गालिचा
स्कंधी हातांचे हार

काळ थांबावा येथे
चित्र स्तब्ध हे व्हावे
तुझा घामेजला स्पर्श
मी मोहरून यावे

हा स्वर्गीय प्रवास
वाटे संपूच नये
सख्या जन्मोजन्मी मला
घेण्या कवेत तू ये

मंद मृदगंध आला
गाली ओघळे तुषार
वेगे पावसाची मजा
ओले मन झाले मोर

वाट थांबली एकांती
हात हातात धरिला
मोरपिसारा मनात
आता चंद्र हाती आला!