स्वप्नातले गाव

निरभ्र निळ्या आभाळाच्या छताखाली
तेथे वसले होते एक छान गाव
त्याला द्या तुम्ही कोणतेही नाव

होती जात गावामधून अरुंदशी वाट
घेत असे ती आढेवेढे आणि मधूनच पळे सुसाट

प्रत्येक वळणावर असे सुंदर एक फुलझाडांची बाग
कुंपण नसलेल्या घरांभोवती सतत तिची जाग

दूर आकाशाच्या किनारी दिसे अवाढव्य डोंगर
त्याच्यावरच्या देवळामध्ये नेहमी असे जागर

एका बाजूच्याशेतामध्ये उभे मोठे चिंचेचे झाड
चंद्र त्याच्या आडोशाने म्हणे माझे चित्र काढ

हि तर आहे नदी वाहती तिच्या काठी औदुंबर
त्याच्या आश्रयाला आहे अनेक पक्षांचे माहेरघर

उसाच्या मळ्यातून चालते आहे पांढ ऱ्या बैलांची जोडी
त्यांच्या गळ्यातील घुगरे वाजताहेत थोडी थोडी

हंबरण्याचा आवाज येतो दिवेलागणीच्या वेळी
पाहिले होते हे गाव असे वाटते कुण्या एकेकाळी

मला खात्री आहे तुम्हाला माहित आहे हे गाव
आठवले तर जरूर सांगा मला त्याचे नाव.