आईच्या कुशीत हसू की हुंदका?

पोरी सगळ्या अशाच
पोटात एक ओठावर दुसरंच
सहजासहजी ओळखू येईल का?
आईच्या कुशीत हसू की हुंदका?
‍*
बापाकडून काही हवं तर
आईला मस्का मारतील
आईकडची मागणी असेल
तर बापाचे पाय चेपतील
*
नव-यासाठी जगापुढे
दुर्गा बनून लढतील
पण वडलांसाठी नव-यालाही
ओरबडून काढतील
*
आपली बहीण नेहमीच
असते जीव की प्राण
थोरला भाऊ पहायलाच नको
तो तर जगात महान
*
आई स्वैपांकात झीरो जरी
जगातली श्रेष्ठ सुग्रण असते
बाप शाळेत क्लार्क तरी
कलेक्टर असल्याचे भासते
*
तुमची असो वा माझी
बिदाईवेळी आसू काढतेच
मुलगी नसेल आपली तरीही
काळीज आपलं फाडतेच
‍*