मृत्यू

Submitted by वर्षा_म on 12 December, 2011 - 06:46

अचानक समोर येउन
वेळ झालीये चल म्हणालास
दचकले, घाबरले
रडकुंडीला आले

विनवणी करुन पंधरा दिवस
मागितले उरलेल्या कामांसाठी

तर तू नविन कल्पना मांडलीस
"मी तुला पंधरा दिवस पुढचे दाखवतो"

माझ्या डोळ्यांवर अलगद हात ठेवलेस
आणि चित्र पंधरा दिवस पुढे सरकले

माझ्या घराच्या भिंतीवर
चंदनाची माळ घालुन
माझा सुहास्य फोटो
अडकवलाय

अडखळले थोडीशी
पण सावरले स्वतःला
हळुच आत डोकावले
सगळे कसे पुर्वीसारखेच
सुरळीत चाललेय

कुणालाच माझी उणीव
भासत नाहीये

माझ्या पश्चात रडत-कुडत
बसण्यापेक्षा सुरळीत चाललेले
पाहुन वाईट वाटले

मी मृत्यूलाही यांच्यासाठी
थांबवायला निघाले होते
यांना गरजच नाही माझी
उगाचच यांच्यासाठी
जन्मभर मर मर मेले

हळुच म्हणालास
म्हणजे मेल्यावरही
"मी" गेला नाही तर?

गुलमोहर: 
कविता
शेअर करा

खूप सुंदर! (काही टायपो आहेत - मर मर मेले असे म्हणतात बहुधा, उणीव, मृत्यू, कुणालाच चे कुणलच असे काहीसे झाले असावे, उगी ऐवजी उगाचच इत्यादी) Happy

चुभुद्याघ्या

खूप आवडला मेसेज Happy

-'बेफिकीर'!

Submitted by बेफ़िकीर on 12 December, 2011 - 09:00

Pages