गटबाजी

गटबाजी
===========
सूचना - यातल्या पात्रांचा कुठल्याही व्यक्तीशी संबंध नाही.. सगळं काल्पनिक आहे. पण यातल्या घटनांचा सद्य परिस्थितीशी अगदी जवळचा संबन्ध आहे. यातल्या जाती, पंथ, धर्म, प्रांतवाचक उल्लेखांनी कुणाच्या भावनांना दुखवण्याचा हेतू नाहीये. कृपया हलकेच घ्यावे..
===========

संवाद १ :

स्थळ - सौमित्र सोसायटी, पुणे.

जोशीकाकू - काय कुलकर्णीकाकू ? ठरलं का लग्न सुमीचं?
कुलकर्णीकाकू - आता तुमच्याशी काय खोटं बोलायचं हो, तिनंच एक मुलगा आणला होता दाखवायला, तिचा जवळचा मित्र आहे म्हणत होती...
जोकाकू - आजकाल चालायचंच हो असं सगळं,
कुकाकू - कुणी पाठक म्हणून आहे,
जोकाकू - देशस्थ ऋग्वेदी आहेत ना, मग झालं !
जोकाकू - नाही ना, यजुर्वेदी आहेत, आमच्या अख्ख्या घराण्यात कुणी जातीबाहेर म्हणून लग्न केलं नाही, पण पोरगी पापात घालणार असंच दिसतय...

=================================
संवाद २ :

स्थळ - अष्टविनायक इंपोर्ट एक्स्पोर्ट कंपनी, जेवणाची सुट्टी

जोशी - जेवण छान झालय हं पाठक्या ! असाच वहिनीच्या हातचा डबा घेऊन येत जा..
पाठक - अरे तुझा पण डबा मस्त आहे, उसळ अशी झणझणीत आहे, मजा आ गया..
जोशी - ए आपट्या, तुझ्या डब्यात आज काय आहे रे?
आपटे - अरे माझ्या डब्यात अगदी मला पुरेल इतकंच जेवण आहे रे, मी तुमच्याशी कुठुन शेयर करू?
पाठक - हो रे आपट्या, तुझी ही रोजचीच रड आहे, साला कंजूस कोब्रा कुठला..
जोशी - हा हा हा...
==================================
संवाद ३ :

स्थळ - मधुबन सोसायटी, मुम्बई

आपटेआजोबा - नवीन शेजारी काय म्हणतायत जोशीबुवा?
जोशीआजोबा - मागच्या जन्मीचं काहीतरी असणार, त्याशिवाय का रोज अभक्ष्यभक्षणाचा वास सहन करावा लागतोय..
आपटे - का बरं? आपल्यातलेच आहेत ना?
जोशी - कुणी मराठ्याचे पवार की काय, ते आहेत, काय ती भाषा, काय ते अघळपघळ वागणं, आणि मांसाहार.. शिव शिव शिव...
===================================
संवाद ४ -

स्थळ - चंदुमल टपारिया माध्यमिक प्रशाला, शिक्षक कक्ष

पवार सर - शेवटी प्रवेश मिळाला एकदाचा माझ्या मुलाला..
काळे सर - कुठली शाखा? कुठे मिळाला प्रवेश?
पवार सर - तुळजापूरच्या अभियांत्रिकी कॉलेजमध्ये मिळालाय, खूप प्रयत्न केला पण शेवटी सिव्हिलवर समाधान मानावं लागलं.. तरी बरं ग्रूपला ९२ टक्के होते..
काळे सर - हं ... आपण ओपन लोक म्हणजे हे रडगाणे आलेच.. कांबळेच्या मुलीला ग्रूपला ८२ टक्केच होते, तिला सीओईपी मध्ये कंम्प्यूटर मिळालं म्हणे.. आता पुढच्या वर्षी माझ्या मुलाचं काय होणार कोण जाणे!?
====================================

संवाद ५ -

स्थळ - शिवाजी मैदान

नेहमीचेच यशस्वी -
या लोकांना हजला जाण्यासाठी विशेष सवलती मिळतात, मायनॉरिटी म्हणून तुष्टीकरणाचे अनेक उपाय केले जातात, पण आज आपल्या देशात गुन्हेगारीचे प्रमाण पाहिले तर तुम्हाला कळेल की जास्तीत जास्त गुन्हेगार हे मुस्लीमच आहेत.. त्यात पुन्हा या देशद्रोही अतिरेकी कारवाया, यांना परत पाकिस्तानात पाठवलं तरच आपला देश सुरक्षीत होईल यात मला तरी काहीच शंका वाटत नाही, जय महाराष्ट्र !
=====================================

संवाद ६ -

स्थळ - नवीन मल्टीप्लेक्सचे बांधकाम चालू असलेली जागा.. पुणे

एका नवीन पक्षाचा कार्यकर्ता - ए, तुझं नाव काय रे?
कामगार१ - सर, मराठी नही आता..
कामगार२ - त्याचं नाव शर्मा हाय सर.. बिहारचा हाय त्यो..
ए न प का - चला रे, या साल्याला द्या दोनचार ठेऊन आणि द्या पाठवून त्याच्या घरी ... ए, तुझं नाव काय रे?
कामगार३ - सर, माझं नाव अब्दुल आहे, मी इथलाच हडपसरचा आहे सर..
ए न प का - ठीक आहे, तु मराठी बोलतोस ना, मग घाबरायचं नाही, आपण है ना... !
======================================

संवाद ७ -

स्थळ - ओमाहा, अमेरिका, कोहीनूर इंडियन स्टोअर..

खरेदी करणारा भारतीय - सो व्हेअर आर यु फ्राम?
दुकानदार - आयाम फ्राम पंजाब..
ख क भा - बहोत अच्छे .. हिंदी तो आतीही होगी आपको..
दु - हां, आती है.. पर थोडी उर्दु मिक्स हो जाती है.. लाहौरसे है ना हम..
ख क भा - अच्छा, पाकिस्तानसे है ...... खैर, आपने स्टोअर तो अच्छा बनाया हुआ है.. अगर आपका स्टोअर नही होता तो पता नही हमारा क्या होता. अपने साऊथ एशियन मसाले और खाने की बात इन अमरीकी लोगोंके खाने मे कहां..
दु - ये बात तो बिल्कुल दुरुस्त है.. वैसे अगर आप जैसे इतने सारे हिन्दुस्थानी यहां नही होते, तो पता नही हमारे स्टोअरमे खरीदने के वास्ते कौन तशरीफ लाता? इन्शाल्लाह, आप है इसलिये हम है !!
ख क भा - हा हा हा, ये भी सही है..

============================

तात्पर्य - लोक वेगवेगळ्या ठिकाणी परिस्थितीनुसार वेगवेगळी गटबाजी करतात.. पृथ्वीवर जर एकी साधायची असेल तर कुणीतरी परग्रहावरूनच आलं पाहिजे !

=== समाप्त ===